The Pre-Conciliar Ambrosian Rite Mass (Latin)

ORDINARIUM MISSAE

Sacerdos Missam celebraturus, cum ingreditur ad Altare, facta illi debita reverentia, stans ad infimum gradum, signat se signo Crucis, congrua voce dicens:
 In nomine Patris +, et Filii, et Spiritus Sancti. Amen.
Deinde, junctis manibus ante pectus, incipit Antiphonam:
V. Introibo ad altare Dei.
R. Ad Deum qui lætificat juventutem meam.
V. Confitemini Domino, quoniam bonus.
R. Quoniam in sæculum misericordia ejus.

Deinde profunde inclinatus facit Confessionem ut infra:
 Confiteor Deo omnipotenti, beatæ Mariæ semper Virgini, beato Michæli Archangelo, beato Joanni Baptistæ, sanctis Apostolis Petro et Paulo, Beato Ambrosio Confessori, omnibus Sanctis, et vobis, fratres: quia peccavi nimis cogitatione, verbo, et opere: (percutit sibi pectus ter, dicens:) mea culpa, mea culpa, mea maxima culpa. Ideo precor beatam Mariam semper Virginem, beatum Michælem Archangelum, beatum Joannem Baptistam, sanctos Apostolos Petrum et Paulum, beatum Ambrosium Confessorem, omnes Sanctos, et vos, fratres, orare pro me ad Dominum Deum nostrum.
Ministri respondent: Deo gratias. Misereatur tui omnipotens Deus, et dimissis omnibus peccatis tuis, perducat te ad vitam æternam.
Sacerdos dicit: Amen et erigit se.

Deinde Ministri repetunt Confessionem:
 Confiteor Deo omnipotenti, beatæ Mariæ semper Virgini, beato Michæli Archangelo, beato Joanni Baptistæ, sanctis Apostolis Petro et Paulo, Beato Ambrosio Confessori, omnibus Sanctis, et tibi, pater: quia peccavi nimis cogitatione, verbo, et opere: (percutiunt sibi pectus ter, dicentes:) mea culpa, mea culpa, mea maxima culpa. Ideo precor beatam Mariam semper Virginem, beatum Michælem Archangelum, beatum Joannem Baptistam, sanctos Apostolos Petrum et Paulum, beatum Ambrosium Confessorem, omnes Sanctos, et te, pater, orare pro me ad Dominum Deum nostrum.
Postea Sacerdos, junctis manibus, stans ut supra, dicit: Deo gratias. Misereatur vestri omnipotens Deus, et dimissis omnibus peccatis vestris, perducat vos ad vitam æternam.
R. Amen.
Tum ille signat se, stans ut supra et dicit:
 Indulgentiam absolutionem, et remissionem omnium peccatorum nostrorum, tribuat nobis omnipotens et misericors Dominus:
R. Amen.

Sacerdos iterum se signat stans pariter et dicens:
V. Adjutorum nostrum in nomine Domini.
R. Qui fecit cælum et terram.
V. Sit nomen Domini benedictum..
R. Ex hoc nunc et usque in sæculum.
Tunc inclinatus ut supra, secreto dicit: Rogo te, altissime Deus Sabaoth, Pater Sancte, ut peccatis meis possim intercedere, et astantibus veniam peccatorum promereri, ac pacificas singulorum hostias immolare.
Accedit ad Altare, et præmissa genuflexione, si in altari est Sanctissimum Sacramentum in tabernaculo reconditum, inclinatus dicit: Oramus te, Domine, per merita Sanctorum tuorum, (facit Crucis signum in medio altaris, illudque osculatur dicens:) quorum reliquiæ hic sunt, et omnium Sanctorum, ut indulgere digneris omnia peccata mea. Amen.
Omnes suprædictæ præces, non autem osculum altaris, signo Crucis præmisso, omittuntur, quoties alia actio liturgica immediate præcessit.

In Missa solemni, et in Missa cantata in qua adhibetur incensum, dummodo non sit Defunctorum, Celebrans benedicit incensum, dicens: Ab illo benedi+caris, in cujus honore cremaberis. Amen. Tum, accepto thuribulo a Diacono vel Ministrante, incensat Altare, nihil dicens. Deinde Diaconus vel Ministrans, recepto thuribulo a Celebrante, incensat illum tantum.

Deinde Celebrans, in cornu Epistolæ, se signans +, clara voce, incipit Ingressam. Postea prosequitur iunctis manibus. In Missis Defunctorum, non signat se, autem facit signum Crucis super Missale.
Qua finita, extendens et iungens manus, dicit:
V. Dominus vobiscum.
R. Et cum spiritu tuo.

Postea in medio Altaris extendens et jungens manus, caputque aliquantulum inclinans, inchoat, si dicendum est, Gloria in excelsis Deo, et prosequitur junctis manibus. Cum dicit Adoramus te, Gratias agimus tibi, et Jesu Christe, et Suscipe deprecationem, inclinat caput: et in fine dicens: Cum Sancto Spiritu signat se a fronte ad pectus.
 Gloria in excelsis Deo. Et in terra pax hominibus bonæ voluntatis. Laudamus te. Benedicimus te. Adoramus te. Glorificamus te. Gratias agimus tibi propter magnam gloriam tuam. Domine Deus, Rex cælestis, Deus Pater omnipotens. Domine Fili unigenite, Jesu Christe. Domine Deus, Agnus Dei, Filius Patris. Qui tollis peccata mundi, miserere nobis. Qui tollis peccata mundi, suscipe deprecationem nostram. Qui sedes ad dexteram Patris, miserere nobis. Quoniam tu solus Sanctus. Tu solus Dominus. Tu solus Altissimus, Jesu Christe. Cum + Sancto Spiritu in gloria Dei Patris. Amen.
Kyrie eleison.
Kyrie eleison.
Kyrie eleison.

Deinde dicit:
V. Dominus vobiscum.
R. Et cum spiritu tuo.
Postea, ut postulat Missæ ordo, dicit unam, vel plures Orationes super populum: et sic de aliis.
Qua finita, cum pervenerit ad conclusionem, jungens manus, clara voce dicit:
V. Per omnia sæcula sæculorum.
R. Amen.

Sacerdos extendit manus, dicens:
V. Dominus vobiscum.
R. Et cum spiritu tuo.

Junctis manibus et super librum positis, dicit:
V. Lectio….
Sequitur Lectura, antequam secrete dicit: Jube Domne benedicere. Deinde, se ipsum signans, dicit: Prophetica (vel Apostolica, vel Ecclesiastica) + Lectio sit nobis salutis eruditio. Qua finita, responditur:
R. Deo gratias.
In Missa solemni, oratione expleta, Lector librum sumit, ambonem ascendit vel accedit ad cancellos, lectionem cantat vel legit, petens benedictionem, profonde inclinatus: Jube Domne benedicere. Celebrans vero benedicit dicens: Prophetica (vel Apostolica, vel Ecclesiastica) + Lectio sit tibi salutis eruditio. Faciens signum Crucis versus lectorem.

Postea, dicicitur Psalmellus.
Quo facto, Sacerdos extendit manus, iterum dicens:

V. Dominus vobiscum.
R. Et cum spiritu tuo.

Junctis manibus et super librum positis, dicit:
V. Epistola beati… Apostoli…
Sequitur Epistola, antequam secrete dicit : Jube Domne benedicere. Deinde se ipsum signans, dicit: + Apostolica doctrina repleat nos gratia divina. Qua finita, responditur:
R. Deo gratias.
In Missa solemni, Subdiaconus cantat vel legit, petens benedictionem, profonde inclinatus: Jube Domne benedicere. Celebrans vero benedicit dicens: + Apostolica doctrina repleat te gratia divina. Faciens signum Crucis versus lectorem.

Sequitur Versus in Hallelujah vel Cantus, prout Tempus aut qualitas Missæ postulat.
His finitis, si est Missa solemnis, Diaconus deponit librum Evangeliorum super medium Altaris, et Celebrans benedicit incensum, ut supra: deinde Diaconus genuflexus in supremo gradu ante Altare, manibus junctis, dicit:
 Munda cor meum ac labia mea, omnipotens Deus, qui labia Isaiæ Prophetæ calculo mundasti ignito: ita me tua grata miseratione dignare mundare, ut sanctum Evangelium tuum digne valeam nuntiare. Per Christum Dominum nostrum. Amen.
Postea accipit librum de Altari, et rursus genuflexus petit benedictionem a Sacerdote, dicens: Jube, Domne benedicere.
Sacerdos respondet: Dominus sit in corde tuo et in labiis tuis: ut digne et competenter annunties Evangelium suum. In nomine Patris +, et Filii, et Spiritus Sancti. Amen.

Et, accepta benedictione, osculatur menum Celebrantis: et cum aliis Ministris, incenso, et luminaribus, accedens ad locum Evangelii, stans junctis manibus, dicit: Dominus vobiscum.
R. Et cum spiritu tuo.
Et pronuntians: Lectio sancti Evangelii secundum N., pollice dexteræ manus signat librum in principio Evangelii, quod est lecturus, deinde seipsum in fronte, ore, et pectore: et dum Ministri respondent: Gloria tibi, Domine, incensat ter librum, postea prosequitur Evangelium junctis manibus. Subdiaconus defert librum Sacerdoti, qui osculatur Evangelium, dicens: Per evangelica dicta deleantur nostra delicta. Deinde Sacerdos incensatur a Diacono.

Si vero Sacerdos sine Diacono et Subdiacono celebrat, delato libro ad aliud cornu Altaris, inclinatus in medio, junctis manibus dicit: Munda cor meum ut supra, et Jube, Domine, benedicere. Postea signat se signo Crucis, dicens: Dominus sit in corde meo et in labiis meis: ut digne et competenter annuntiem evangelium suum. In nomine Patris +, et Filii, et Spiritus Sancti. Amen.
Deinde, conversus ad librum, junctis manibus, dicit:
V. Dominus vobiscum.
R. Et cum spiritu tuo.
Et pronuntians: Lectio sancti Evangelii secundum N., signat librum, et se in fronte, ore, et pectore, et legit Evangelium, ut dictum est. Quo finito, respondet Minister: Laus tibi, Christe, et Sacerdos osculatur Evangelium, dicens: Per evangelica dicta deleantur nostra delicta.

In Missis Defunctorum dicitur Munda cor meum sed nulla benedictio petitur, non deferuntur liminaria neque incensum; Celebrans non osculatur librum, nec dicit: Per Evangelica dicta, etc.

Post Evangelium, Celebrans homiliam, si habenda est, habet, eaque finita, stans in medio Altaris, extendens et iungens manus, dicit:
V. Dominus vobiscum.
R. Et cum spiritu tuo.
Kyrie eleison,
Kyrie eleison,
Kyrie eleison.

Quæ omnia omittuntur in Missæ pro defunctis.
Tum, iunctis manibus, legit Antiphonam post Evangelium, si legenda est. Deinde, extendens et iungens manus, dicit:
V. Pacem habete.
R. Ad te, Domine.
Qui versiculus dicitur a Diacono, si adsit, et omittitur in Missæ pro Defunctis, et in Missa Vespertina feriæ V in Coena Domini.
V. Dominus vobiscum.
R. Et cum spiritu tuo.

Et manibus extensis dicitur Oratio super Syndonem. Qua finita, cum pervenerit ad conclusionem, jungit manus, clara voce dicens:
V. Per omnia sæcula sæculorum.
R. Amen.

Quo dicto, si est Missa solemnis, Diaconus porrigit Celebranti Patenam cum Hostia. Si privata, Sacerdos ipse accipit Patenam cum Hostia, quam offerens, elevatis oculis ad Cælum, secrete dicit:
 Suscipe, sancte Pater, omnipotens æterne Deus, hunc panem sanctum ut fiat Unigeniti tui Corpus, in nomine Patris +, et Filii, et Spiritus Sancti. Amen.
Reposita Hostia super Corporale, infundit vinum in Calicem dicens:
 De latere Christi exivit Sanguis.
Deinde aquam benedicit, dicens:
 et aqua pariter, in nomine Patris +, et Filii, et Spiritus Sancti. Amen.
In Missis pro Defunctis, Sacerdos dicit tantum et aqua pariter, et non benedicit. In Missa solemni Diaconus ministrat vinum, Subdiaconus aquam in Calice.
Tum, accepto Calice, Sacerdos illum offert, dicens:
 Suscipe, clementissime Pater, hunc Calicem, vinum aqua mixtum, ut fiat Unigeniti tui Sanguinis, in nomine Patris +, et Filii, et Spiritus Sancti. Amen.
Calice super Corporale posito, et Palla cooperto: tum, junctis manibus et super Altare positis, profunde inclinatus, dicit:
 Omnipotens sempiterne Deus, placabilis, et acceptabilis sit tibi hæc oblatio, quam ego indignus pro me misero peccatore, et pro delictis meis innumerabilibus tuæ pietati offero, ut veniam, et remissionem omnium peccatorum meorum mihi concedas: et iniquitates meas ne respexeris, sed sola tua misericordia mihi prosit indigno. Per Christum Dominum nostrum.
Sacerdos, erigens se, expansis manibus, prosequitur:
 Et suscipe, sancta Trinitas, hanc oblationem, quam tibi offerimus pro regimine, et custodia, atque unitate catholicæ Fidei: et pro veneratione quoque beatæ Dei Genitricis Mariæ, omniumque simul Sanctorum tuorum; et pro salute et incolumitate famulorum famularumque tuarum, et omnium, pro quibus clementiam tuam implorare polliciti sumus, et quorum quarumque eleemosynas suscepimus, et omnium fidelium Christianorum, tam vivorum, quam defunctorum: ut, te miserante, remissionem omnium peccatorum, et æternæ beatitudinis præmia, in tuis laudibus fideliter perseverando, percipere mereantur, ad gloriam et honorem nominis tui, Deus, misericordissime rerum conditor. Per Christum Dominum nostrum.
In Dominicis tantum, dicit: Suscipe, sancta Trinitas, hanc oblationem, quam tibi offerimus in memoriam passionis, ressurrectionis, et ascensionis Domini nostri Jesu Christi: et in honorem omnium Sanctorum tuorum, qui tibi placuerunt ab initio mundi, et eorum, quorum hodie festivitas celebratur, et quorum hic nomina, et reliquiæ habentur: ut illis sit ad honorem, nobis autem ad salutem: ut illi omnes pro nobis intercedere dignentur in Cælis quorum memoriam facimus in terris. Per eundem Christum Dominum nostrum.
Postea junctis deinde expansis manibus super oblatam, dicit:
Et suscipe, sancta Trinitas, hanc oblationem, pro emundatione mea, ut mundes et purges me ab universis peccatorum maculis: quatenus tibi digne ministrare merear, Deus et clementissime Domine.
Sacerdos, jungit manus, elevat oculos ad Cælum, benedicit oblata, prosequendo:
Benedictio Dei omnipotentis, Patris +, et Filii +, et Spiritus sancti (tunc manus expansas imponit super oblata) copiosa de cælis descendat super hanc nostram oblationem et accepta sit tibi hæc oblatio, Domine, sancte Pater, omnipotens æterne Deus, misericordissime rerum conditor.

Postea, si solemniter celebrat, præterquam in Missis pro Defunctis, benedicit incensum, dicens:
 Per intercessionem beati Michaëlis archangeli, stantis a dextris altaris incensi, et omnium electorum suorum, incensum istud dignetur Dominus bene+dicere, et in odorem suavitatis accipere. Per Christum Dominum nostrum. Amen.

Et accepto thuribulo a Diacono, incensat oblata, modo in Rubricis præscriptuo dicens, in Missis quoque pro Defunctis:
 Incensum istud, a te benedictum, ascendat ad te, Domine, et descendat super nos misericordia tua.
Deinde incensando Altare, dicit, in Missis quoque pro defunctis:
 Dirigatur, Domine, oratio mea, sicut incensum in conspectu tuo:
elevatio manuum mearum sacrificium vespertinum.
 Pone, Domine, custodiam ori meo, et ostium circumstantiæ labiis meis:
ut non declinet cor meum in verba malitiæ, ad excusandas excusationes in peccatis. Ps. CXL, 2-4
Postea reddit Thuribulum Diacono, dicens, in Missis quoque pro defunctis:
 Ecce odor Sanctorum Dei, tamquam odor agri pleni, quem Deus benedixit.
Tunc incensatur Sacerdos a Diacono, deinde alii per ordinem.

Deinde Sacerdos, expandit et elevat manus ad Cælum: quabus postea junctis, inchoat, si dicendum est, Credo in unum Deum. Cum dicit Deum, caput Cruci inclinat: quod similiter facit, cum dicit Jesum Christum, et simul adoratur. Ad illa autem verba Et incarnatus est, genuflectit usque dum dicatur Et homo factus est. In fine ad Et vitam venturi sæculi, signat se signo crucis a fronte ad pectus.
V. Dominus vobiscum.
R. Et cum spiritu tuo.
 Credo in unum Deum, Patrem omnipotentem, factorem cæli et terræ, visibilium omnium et invisibilium. Et in unum Dominum Jesum Christum, Filium Dei unigenitum. Et ex Patre natum ante omnia sæcula. Deum de Deo, lumen de lumine, Deum verum de Deo vero. Genitum, non factum, consubstantialem Patri: per quem omnia facta sunt. Qui propter nos homines, et propter nostram salutem fdescendit de cælis. (Hic genuflectitur) Et incarnatus est de Spiritu Sancto ex Maria Virgine: et homo factus est. Crucifixus etiam pro nobis; sub Pontio Pilato passus, et sepultus est. Et resurrexit tertia die, secundum Scripturas. Et ascendit ad cælos: sedet ad desteram Patris. Et iterum venturus est cum gloria judicare vivos et mortuos: cujus regni non erit finis. Et in Spiritum Sanctum, Dominum et vivificantem: qui ex Patre Filioque procedit. Qui cum Patre, et Filio simul adoratur et conglorificatur: qui locutus est per Prophetas. Et unam, sanctam, catholicam et apostolicam Ecclesiam. Confiteor unum baptisma in remissionem peccatorum. Et exspecto resurrectionem mortuorum. Et vitam venturi sæculi. Amen.
Postea dicit:
V. Dominus vobiscum.
R. Et cum spiritu tuo.

Deinde, manibus extensis, subjungit Orationem super oblatam. Qua finita, cum pervenerit ad conclusionem, clara voce dicit:
V. Per omnia sæcula sæculorum.
R. Amen.

In prædictæ Orationis conclusione, dicens per omnia sæcula sæculorum, ponit manus hinc inde super altare: mox illas aliquantulum elevat usque ad pectus, ita uta una palma alteram respiciat, dum dicit Sursum corda. Easdem jungens, inclinat caput, cum dicit Gratias agamus. Deinde ipsas disjungit, usque ad finem Præfactionis ac denique cum dicit Sanctus, jungit ante pectus manus. Advertendum vero hic est ad locum, ubi subiugenda est Præfactio de proprio, ut congruenti loco proprium connectatur cum communi.
V. Dominus vobiscum.
R. Et cum spiritu tuo.
V. Sursum corda.
R. Habemus ad Dominum.
V. Gratias agamus Domino Deo nostro.
R. Dignum et justum est.
V. Vere quia dignum et justum est, æquum et salutare, nos tibi semper hic et ubique gratias agere, Domine, sancte Pater, omnipotens æterne Deus. * per Christum (vel eundem Christum) Dominum nostrum. ** Per quem majestatem tuam laudant Angeli, venerantur Arcangeli: Troni, Dominationes, Virtutes, Principatus, et potestates adorant. Quem Cherubim et Seraphim socia exultatione concelebrant. Cum quibus et nostras voces, ut admitti iubeas deprecamur, supplici confessione dicentes:

Præfactione finita, junctis manibus, capite inclinato, cantat vel dicit:
 Sanctus, Sanctus, Sanctus, Dominus Deus Sabaoth.
 Pleni sunt cæli et terra gloria tua.
 Hosanna in excelsis.
(Sacerdos erigit se et facit signum Crucis)
+ Benedictus qui venit in nomine Domini.
Hosanna in excelsis.

Præfactiones aliquando etiam sic terminantur:
* Per eundem Christum Dominum nostrum.
Vel sic: Quam laudant Angeli, etc.
Vel sic: Et ideo cum Angelis et Archangelis, cum Thronis ac Dominationibus, cumque omni militia cælestis exercitus, hymnum gloriæ tuæ canimus, sine fine dicentes:
Vel sic: Propterea cum...
Vel sic: Unde profundis gaudiis totus in orbe terrarum mundus exultat: sed et suparnæ Virtutes, atque angelicæ concinunt Potestates, hymnum gloriæ tuæ perpetim sine fine dicentes:
Vel sic: Quem una tecum, omnipotens Pater, et cum Spiritu sancto laudant Angeli, venerantur Archangeli; Throni, Dominationes, Virtutes, Principatus, et Potestates adorant. Quem Cherubim, et Seraphim, socia exultatione concelebrant. Cum quibus et nostras voces, ut admitti iubeas deprecamur, supplici confessione dicentes:
CANON MISSÆ


Sacerdos extendens, elevans et jungens manus, elevatisque ad cælum oculis, et statim demissis, inclinatus profunde ante Altare, secreto dicit:
 Te igitur, clementissime Pater, per Dominum nostrum Jesum Christum Filium tuum, supplices rogamus ac petimus (facit Crucis signum in medio Altaris illudque osculatur) uti accepta habeas, et benedicas (signat ter super oblatam) hæc + dona, hæc + munera, hæc sancta + sacrificia illibata; (extensis manibus prosequitur) in primis, quæ tibi offerimus pro Ecclesia tua sancta catholica; quam pacificare, custodire, adunare, et regere digneris toto orbe terrarum: una cum famulo tuo Papa nostro N., et Pontifice nostro N., sed et omnibus orthodoxis, atque catholicæ et apostolicæ fidei cultoribus.

Commemoratio pro vivis
 Memento, Domine, famulorum, famularumque tuarum N. et N. (Junctis manibus, inclinato capite, orat aliquantulum pro quibus intendit: deinde extensis manibus prosequitur) et omnium circumstantium, quorum tibi fides cognita est, et nota devotio, pro quibus tibi offerimus: vel qui tibi offerunt hoc sacrificium laudis pro se, suisque omnibus: pro redemptione animarum suarum, pro spe salutis, et incolumitatis suæ: tibique reddunt vota sua æterno Deo, vivo et vero.

Commune Infra Canonem
 Commmunicantes, et memoriam venerantes, in primis gloriosæ semperque Virginis Mariæ, Genitricis Dei et Domini nostri Jesu Christi: * sed et beati Ioseph eiusdem Virginis Sponsi, et beatorum Apostolorum ac Martyrum tuorum,
Petri et Pauli, Cornelii, Cypriani,
Andreæ, Iacobi, Clementis, Chrysogoni,
Ioannis, Thomæ, Ioannis et Pauli,
Iacobi, Philippi, Cosmæ et Damiani,
Bartholomæi, Matthæi, Apollinaris, Vitalis,
Simonis, et Thaddæi, Nazarii et Celsi,
Xysti, Laurentii, Protasii et Gervasii,
Hippolyti, Vincentii, Victoris, Naboris,
Felicis et Calimerii,
et omnium Sanctorum tuorum; quorum meritis precibusque concedas, ut in omnibus protectionis tuæ muniamur auxilio. (jungit manus) Per eundem Christum Dominum nostrum. Amen.

Propria Infra Canonem

In Nativitate Domini et per Octavam.
Communicantes, et (in prima Missa) noctem sacratissimam celebrantes, (in aliis vero diem sacratissimum celebrantes quo) qua beatæ Mariæ intemerata virginitas huic mundo edidit Salvatorem, sed et memoriam venerantes, in primis ejusdem gloriosæ semper Virginis Mariæ, Genitricis Dei et Domini nostri Jesu Christi: * sed et beati Joseph, ejusdem virginia Sponsi, et beatorum Apostolorum et Martyrum tuorum, (ut paulo supra).

In Epiphania Domini et per Octavam.Communicantes, et diem sacratissimum celebrantes, quo Unigenitus tuus, in tua tecum gloria coæternus, in veritate carnis nostræ visibiliter corporalis apparuit: sed et memoriam venerantes, in primis gloriosæ semper Virginis Mariæ, Genitricis Dei et Domini nostri Jesu Christi: * sed et beati Joseph, ejusdem virginia Sponsi, et beatorum Apostolorum et Martyrum tuorum, (ut paulo supra).

In die sancto Pascae, et per Octavam. Communicantes, et diem sacratissimum celebrantes, Resurrectionis Domini nostri Jesu Christi secundum carnem: sed et memoriam venerantes, in primis gloriosæ semper Virginis Mariæ, Genitricis Dei et Domini nostri Jesu Christi: * sed et beati Joseph, ejusdem virginia Sponsi, et beatorum Apostolorum et Martyrum tuorum, (ut paulo supra).

In Ascensione Domini.Communicantes, et diem sacratissimum celebrantes, quo Dominus noster, unigenitus Filius tuus, unitam sibi fragilitatis nostræ substantiam in gloriæ tuæ dextera collocavit: sed et memoriam venerantes, in primis gloriosæ semper Virginis Mariæ, Genitricis Dei et Domini nostri Jesu Christi: * sed et beati Joseph, ejusdem virginia Sponsi, et beatorum Apostolorum et Martyrum tuorum, (ut paulo supra).

In Pentecoste et per Octavam.
Communicantes, et diem sacratissimum Pentecostes celebrantes, quo Spiritus sanctus Apostolis innumeris linguis apparuit: sed et memoriam venerantes, in primis gloriosæ semper Virginis Mariæ, Genitricis Dei et Domini nostri Jesu Christi: * sed et beati Joseph, ejusdem virginia Sponsi, et beatorum Apostolorum et Martyrum tuorum, (ut paulo supra).
Commune infra Actionem
(manibus expansis super oblata)
 Hanc igitur oblationem servitutis nostræ, sed et cunctæ familiæ tuæ, quæsumus, Domine, * ut placatus accipias: diesque nostros in tua pace disponas, atque ab æterna damnatione nos eripi, et in electorum tuorum jubeas grege numerari. (jungit manus) Per Christum Dominum nostrum. Amen.

Propria Infra Actionem

In Pascha, et per Octavam; in vigilia Pentecostes, et per Octavam.
Hanc igitur oblationem servitutis nostræ, sed et cunctæ familiæ, quam tibi offerimus pro his quoque, quos regenerare dignatus es ex aqua et Spiritu Sancto, tribuens eis remissionem omnium peccatorum, quæsumus, Domine* ut placatus suscipias: diesque nostros (ut paulo supra).
 Quam oblationem, quam pietati tuæ offerimus, tu Deus, in omnibus, quæsumus, (signat ter super oblata) bene+dictam, adscri+ptam, ra+tam, rationabilem, acceptabilemque facere digneris: ut nobis (signat semel super Hostiam et semel super Calicem) Cor+pus, et San+guis fiat dilectissimi Filii tui Domini nostri Jesu Christi.

Junctis manibus, vadit ad cornu Altaris, ubi nihil dicens lavat digitos, et abstergit: inde redit ad medium Altaris, et dicit:
 Qui pridie, quam pro nostra omniumque salute pateretur, (accipit Hostiam et elevat oculos) accipiens panem, elevavit oculos ad cælos ad te Deum Patrem suum omnipotentem, tibi gratias agens, (Hostiam benedicit) bene+dixit, fregit, deditque discipulis suis dicens ad eos: Accipite, et manducate ex hoc omnes.
Verba consecrationis, distincte, secreto, et attente dicit:

HOC EST ENIM CORPUS MEUM.

Genuflectit, surgit, elevat Hostiam a populo adorandam; reponit super Corporale: iterum genuflectit. Mox erectus detegit Calicem, Pallam collocans super Hostiam consecratam, et prosequitur:
 Simili modo postquam cænatum est, (accipit Calicem et elevat oculos) accipiens Calicem, elevavit oculos ad cælos ad te Deum Patrem suum omnipotentem: item tibi gratias agens, (sinistra tenens Calicem, dextera signat super eum) bene+dixit, tradiditque discipulis suis, dicens ad eos: Accipite, et bibite ex eo omnes.
Calicem tenens ambabus manibus parum elevatum, profert verba consecrationis.

HIC EST ENIM CALIX SANGUINIS MEI,
NOVI ET ÆTERNI TESTAMENTI: MYSTERIUM FIDEI:
QUI PRO VOBIS ET PRO MULTIS EFFUNDETUR
IN REMISSIONEM PECCATORUM.

Deponit Calicem, statimque supra ipsum primores digitos tergit. Tum genuflectit, surgit, ostendit populo, dicens:
 Mandans quoque et dicens ad eos: Hæc quotiescumque feceritis, in meam commemorationem facietis: mortem meam prædicabitis, resurrectionem meam annunciabitis, adventum meum sperabitis, donec iterum de cælis veniam ad vos.

Reponit, tegit, et iterum genuflectit adorans. Deinde extensis brachis in modum Crucis, dicit:
 Unde et memores, Domine, nos servi tui sed et plebs tua sancta, Domini nostri Iesu Christi Passionis, nec non et ab inferis mirabilis Resurrectionis, sed et in cæelo gloriosissimæ Ascensionis, (jungit manus) offerimus præclaræ maiestati tuæ de tuis donis ac datis (oblata ter signat communiter) hostiam + puram, hostiam + sanctam, hostiam + immaculatam, (tum semel super Hostiam solam et semel super Calicem solum) hunc Panem + sanctum vitæ æternæ, et Calicem + salutis perpetuæ.

Deinde extensis manibus ante pectus, dicit:
 Supra quæ propitio ac sereno vultu tuo respicere digneris, et accepta habere, sicuti accepta habere dignatus es munera justi pueri tui Abel, et sacrificium Patriarchæ nostri Abrahæ, et quod tibi obtulit summus sacerdos tuus Melchisedech, sanctum sacrificium, immaculatam hostiam.

Junctis deinde manibus, et super Altare positis, profunde inclinatus dicit:
 Supplices te rogamus, omnipotens Deus, jube hæc perferri per manus sancti Angeli tui in sublime altare tuum, ante conspectum tremendæ majestatis tuæ: (facit Crucis signum in medio Altaris, illudque osculatur) ut quoquot ex hac altaris participatione (producit signum Crucis semel super Hostiam, et semel super Calicem) sacrosanctum Cor+pus, et San+guinem Domini nostri Iesu Christi sumpserimus, (signat se) omni benedictione cælesti et gratia repleamur. (jungit manus) Per eumdem Christum Dominum nostrum. Amen.

Commemoratio pro defunctis
Memento etiam, Domine, famulorum famularumque tuarum qui nos præcesserunt cum signo fidei, et dormiunt in somno pacis N. et N.
(jungit manus, et orat pro his defunctis, pro quibus intendit. Tum extensis manibus dicit): Ipsis, Domine, et omnibus in Christo quiescentibus, locum refrigerii, lucis ac pacis, ut indulgeas, deprecamur. (jungit manus, et caput inclinat) Per eumdem Christum Dominum nostrum. Amen.

Manu dextera percutit pectus, elata aliquantulum voce dicens:
 Nobis quoque minimis, et peccatoribus, (reliqua secreto) famulis tuis de multitudine misericordiæ tuæ sperantibus, partem aliquam, et societatem donare digneris, cum tuis sanctis Apostolis et Martyribus,
Ioanne et Ioanne, Perpetua, Anastasia,
Stephano, Andrea, Agata, Euphemia,
Barnaba, Petro, Lucia, Justina,
Marcellino, Agnete, Sabina, Thecla,
Cæcilia, Felicitate, Pelagia atque Catharina,
et cum omnibus Sanctis tuis: intra quorum nos consortium non æstimator meriti, sed veniæ, quæsumus, largitor admitte. (jungit manus) Per Christum Dominum nostrum.

Per quem hæc omnia Domine, semper bona creas, (signat ter supra Hostiam, et Calicem dicens) sancti+ficas, vivi+ficas, bene+dicis, et nobis famulis tuis largiter præstas, ad augmentum fidei, et remissionem omnium peccatorum nostrorum.

Discooperit Calicem et, facta genuflectione, dicit:
Et est tibi Deo Patri omnipotenti
cum Hostia facit ter signa Crucis super Calicem dicens:
ex + ipso, et per + ipsum, et in + ipso omnis honor, virtus, laus, et gloria,
manu sinistra accipit Hostiam, quam tenet parum elevata super Calicem, dexteraque Patenam, qua facit ter signa Crucis simul super Hostiam ac Calicem, et prosequitur:
impe+rium, perpe+tuitas, et po+testas in unitate Spiritus Sancti
Hostiam super Calicem aliquatenus elevat, et dicit:
per infinita sæcula sæculorum.
R. Amen.

Collocato Calice super Corporale, dividit Hostiam per medium supra Calicem, dicens:
 Corpus tuum frangitur, Christe, Calix benedicitur.
Partem, quæ in dextera erat, ponit supra Patenam. Ex altera vero parte, quæ in sinistra, detrahit Particulam, dicens:
 Sanguis tuus sit nobis sempre ad vitam , et ad salvandas animas, Deus noster.
Deponit partem Hostiæ, quæ in sinistra, et Particulam immittit in Calicem, dicens secrete:
Commixtio + consecrati Corporis et Sanguinis Domini nostri Jesu Christi nobis edentibus et sumentibus proficiat ad vitam et gaudium sempiternum.

Tegit Calicem, genuflectit, surgit et legit Confractorium.

Tum dicto submissa voce et inclinato capite, Oremus, clara deinde voce, manibusque junctis, cantat vel dicit:
Præceptis salutaribus moniti, et divina institutione formati, audemus dicere:
Extensis manibus, dicit Orationem Dominicam, inclinans capitem cum dicit sanctificetur nomen tuum:
Pater noster, qui es in cælis: sanctificetur nomen tuum: adveniat regnum tuum: fiat voluntas tua, sicut in cælo, et in terra. Panem nostrum quotidianum da nobis hodie, et dimitte nobis debita nostra, sicut et nos dimittimus debitoribus nostris. Et ne nos inducas in tentationem.
R. Sed libera nos a malo.
Sacerdos secrete dicit: Amen.

Deinde signans se signo Crucis dicit clara voce:
+ Libera nos, quæsumus, Domine, ab omnibus malis, præteritis, præsentibus, et futuris: et intercedente beata Maria Genitrice Dei, ac Domini nostri Iesu Christi, et sanctis Apostolis tuis Petro et Paulo, atque Andrea, et beato Ambrosio Confessore tuo atque Pontifice una cum omnibus Sanctis tuis, da propitius pacem in diebus nostris: ut ope misericordiæ tuæ adiuti, et a peccato simus semper liberi, et ab omni perturbatione securi. Præsta per eum, cum quo beatus vivis et regnas Deus (jungit manus) in unitate Spiritus Sancti Deus. Per omnia sæcula sæculorum.
R. Amen.

Signat se, sinistra super Corporale posita, dicens:
Pax et + communicatio Domini nostri Jesu Christi sit semper vobiscum.
R. Et cum spiritu tuo.
Tum Diaconus, alioquin ipsemet Sacerdos, subdit:
V. Offerte vobis pacem.
R. Deo gratias.

In Missis pro Defunctis, omisso Offerte vobis pacem, et Oratione seguenti, Domine Iesu Christe, qui dixisti apostolis tuis, etc; omisso etiam Pax tecum, (quæ omnia omittuntur etiam in Missa vespertina feriæ V in Coena Domini), junctis manibus clara voce dicit inclinatus Sacramento, Agnus Dei etc., ut infra.
Agnus Dei, qui tollis peccata mundi, dona eis requiem.
Agnus Dei, qui tollis peccata mundi, dona eis requiem.
Agnus Dei, qui tollis peccata mundi, dona eis requiem sempiternam,
et locum indulgentiæ cum Sanctis tuis in gloria.

Dicto Offerte vobis pacem, inclinatus, junctis manibus eisque super Altare positis, subissa voce, dicit tres Orationes sequentes.
 Domine Jesu Christe, qui dixisti Apostolis tuis: Pacem relinquo vobis, pacem meam do vobis: ne respicias peccata mea, sed fidem Ecclesiæ tuæ: eamque secundum voluntatem tuam pacificare, custodire et regere digneris: qui vivis et regnas Deus, per omnia sæcula sæculorum. Amen.

Si pax est tribuenda, facta prius in medio Altaris Cruce +, illud osculatur, et dans pacem, dicit: Pax tecum.
R. Et cum spiritu tuo.

 Domine, sancte Pater, omnipotens æterne Deus, da mihi hoc Corpus Iesu Christi Filii tui Domini mei ita sumere, ut non sit mihi ad judicium, sed ad remissionem omnium peccatorum meorum. Qui tecum vivit et regnat in unitate Spiritus sancti Deus per omnia sæcula sæculorum. Amen.

 Domine Jesu Christe, Fili Dei vivi, qui pro voluntate Patris, cooperante Spiritu Sancto, per mortem tuam mundum universum vivificasti: libera me, obsecro, per hoc sacrosanctum Corpus et Sanguinem tuum a cunctis iniquitatibus, et universis malis: et fac me tuis obedire mandatis, et a te numquam separari permittas. Qui cum eodem Deo Patre et Spiritu Sancto vivis et regnas Deus in sæcula sæculorum. Amen.

Inclinatus, percutiens pectus, elata aliquantulum voce, ter dicit devote et humiliter:
 Domine, non sum dignus, (et secreto prosequitur) ut intres sub tectum meum: sed tantum dic verbo, et sanabitur anima mea.
Genuflectit, surgit, accipit dextera ambas partes Hostiæ et sinistra Patenam, dicens:
 Quid retribuam Domino pro omnibus quæ tribuit mihi? Panem cælestem accipiam, et nomen Domini invocabo. Laudans invocabo Dominum, et ab inimicis meis salvus ero.
Postea, dextera se signans cum Hostia, dicit:
 Corpus + Domini nostri Jesu Christi custodiat animam meam in vitam æternam. Amen.
Sumit ambas partes Hostiæ. Tum junctis manibus, quiescit aliquantulum.
Postea detegit Calicem, genuflectit, et tergit Patenam supra illum, dicens interim:
 Quid retribuam Domino pro omnibus quæ tribuit mihi? Calicem salutaris accipiam, et nomen Domini invocabo. Laudans invocabo Dominum, et ab inimicis meis salvus ero.
Accipit Calicem, et eo signum Crucis sibi faciens, dicit:
 Præsta quæso Domine, ut perceptio Corporis + et Sanguinis Domini nostri Jesu Christi ad vitam nos perducat æternam. Amen.
Sumit Sanguinem, cum particula. Quo sumpto, si qui sunt communicandi, eos communicet, antequam se purificet.

ORDO ADMINISTRANDI SACRAM COMMUNIONEM INTRA MISSAM

Sacerdos, facta genuflexione, ponit particulas in pyxide, vel, si pauci sint communicandi, super patenam, nisi a principio positæ fuerint in pyxide seu alio calice. Interim minister ante eos extendit linteum seu velum album, et pro eis facit confessionem, dicens:
 In nomine Patris, et Filii, et Spiritus Sancti. Amen.

 Confiteor Deo omnipotenti, beatæ Mariæ semper Virgini, beato Michaëli Archangelo beato Ioanni Baptistæ, sanctis Apostolis Petro et Paulo, beato Ambrosio Confessori, omnibus Sanctis, et tibi pater: quia peccavi nimis cogitatione verbo, et opere: mea culpa, mea culpa, mea maxima culpa. Ideo precor beatam Mariam semper Virginem, beatum Michaëlem Archangelum, beatum Ioannem Baptistam, sanctos Apostolos Petrum et Paulum, beatum Ambrosium Confessorem, omnes Sanctos, et te pater, orare pro me ad Dominum Deum nostrum.
Sacerdos genuflectit, surgit, et manibus junctis ante pectus, vertit se ad populum (advertens ne terga vertat Sacramento), et in cornu Evangelii dicit: Deo gratias. Misereatur vestri omnipotens Deus, et dimissis omnibus peccatis vestris, perducat vos ad vitam æternam.
R. Amen.
Et addit: Indulgentiam, + absolutionem, et remissionem omnium peccatorum vestrorum tribuat vobis omnipotens et misericors Dominus.
R. Amen.
Dicens Indulgentiam, etc., manu dextera in formam crucis signat communicandos.

Deinde ad Altare se convertit, genuflectiit, manu sinistra pyxidem prehendit; dextera vero sumit unam Particulam, quam inter pollicem et indicem tenet aliquantulum elevatam super pyxidem: conversusque ad populum in medio Altaris dicit clara voce: Ecce Agnus Dei, ecce qui tollit peccata mundi.

Mox subdit: Domine, non sum dignus, ut intres sub tectum meum: sed tantum dic verbo, et sanabitur anima mea. Quod iterum ac tertio repetit. Postea ad communicandos accedit, incipiens a ministris Altaris, si velint communicare: quibus porrigens Eucharistiam, et faciens cum particula signum crucis, dicit: Corpus Domini nostri Jesu Christi custodiat animam tuam in vitam æternam.
R. Amen.
Potest autem dicere: Corpus Christi.
R. Amen.
Finita communione, revertitur ad Altare, nihil dicens.
Distributione Communionis expleta, Celebrans purificat patenam vel pyxidem super Calicem. Postea dicit:
 Quod ore sumpsimus, Domine, pura mente capiamus, ut de Corpore et Sanguine Domini nostri Iesu Christi fiat nobis remedium sempiternum.
Deinde, stans in medio Altaris, porrigit Calicem Ministro, qui infundit ei parum vini, quo se purificat. Mox, in cornu Epistolæ, abluit digitos vino et aqua, et eos abstergens purificatorio, reverso in medio Altaris, dicit:
 Confirma hoc, Deus, quod operatus es in nobis: et dona Ecclesiæ tuaæ perpetuam tranquillitatem et pacem.
Sumit purificationem, extergit et Calicem, et illum, plicato Corporali, operit more solito.

Deinde stans in cornu Epistolæ, Junctis manibus, legit Transitorium et de more subjungit:
V. Dominus vobiscum.
R. Et cum spiritu tuo.

Postea, extensis manibus, legit Orationem post Communionem. Qua finita, jungens manus, dicit:
V. Per omnia sæcula sæculorum.
R. Amen.
V. Dominus vobiscum.
R. Et cum spiritu tuo.
Kyrie eleison,
Kyrie eleison,
Kyrie eleison.

Sacerdos, stans in medio Altaris et se signans signo Crucis, dicit:
V. + Benedicat et exaudiat nos Deus.
R. Amen.
V. Procedamus cum pace.
R. In nomine Christi.
V. Benedicamus Domino.
R. Deo gratias.

In Missis pro Defunctis, dicto Dominus vobiscum, et responso: Et cum spiritu tuo, sine Kyrie eleison, stans in medio Altaris producit dextera signum Crucis, dicens:
V. Requiem + æternam dona eis (ei), Domine.
R. Et lux perpetua luceat eis (ei).
V. Animæ istorum, (Anima istius) et (Animæ) omnium fidelium Defunctorum, per Dei misericordiam requiescant in pace.
R. Amen.
Verba Anima istius vel Animæ istorum, omittuntur in Commemoratione omnium fidelium Defunctorum.

Et dicto Placeat, non datur benedictio, sed Sacerdos, signo Crucis præmisso, osculato Altari, legit Evangelium sancti Joannis.

Deinde profonde inclinatus ante medium Altaris, super quem ponit junctas manus, dicit secrete:
 Placeat tibi, Deus, obsequium servitutis nostræ: et sacrificium, quod oculis tuæ divinæ maiestatis indignus obtuli, sit tibi acceptabile, mihique, et omnibus pro quibus illud obtuli, sit, te miserante, propitiabile. Per Christum Dominum nostrum. Amen.

Facta prius Cruce in medio Altaris, illud osculatur; deinde erigens se, atque adhuc stans versus Altare, extendens, elevans, et jungens manus caputque Cruci inclinans, dicit:
Benedicat vos omnipotens Deus,
Et, facta genuflexione, versus ad populum, benedicens, prosequitur.
Pater +, et Filius, et Spiritus Sanctus.
R. Amen.
In Missa Pontificali ter benedicitur, ut in Pontificali habetur.

Deinde Sacerdos in cornu Evangelii, junctis manibus dicit:
V. Dominus vobiscum.
R. Et cum spiritu tuo.
Et signans signo Crucis primum Altare, vel librum, deinde se in fronte, ore, et pectore, dicit:
Initium + sancti Evangelii + secundum + Joannem.
R. Gloria tibi, Domine.
Junctis manibus prosequitur:
 In principio erat Verbum et Verbum erat apud Deum, et Deus erat Verbum. Hoc erat in principio apud Deum. Omnia per ipsum facta sunt, et sine ipso factum est nihil quod factum est. In ipso vita erat, et vita erat lux hominum; et lux in tenebris lucet, et tenebræ eam non comprehenderunt. Fuit homo missus a Deo cui nomen erat Joannes. Hic venit in testimonium, ut testimonium perhiberet de lumine, ut omnes crederent per illum. Non erat ille lux, sed ut testimonium perhiberet de lumine. Erat lux vera quæ illuminat omnem hominem venientem in hunc mundum. In mundo erat, et mundus per ipsum factus est et mundus eum non cognovit. In propria venit, et sui eum non receperunt. Quotquot autem receperunt eum, dedit potestatem filios Dei fieri; his qui credunt in nomine eius, qui non ex sanguinibus, neque ex voluntate carnis, neque ex voluntate viri, sed ex Deo nati sunt. (genuflectit dicens) Et verbum caro factum est, (et surgens prosequitur) et habitavit in nobis: et vidimus gloriam ejus, gloriam quasi Unigeniti a Patre, plenum gratiæ et veritatis.
R. Deo gratias.